أسرع سيارة في العالم هي الآن سيارة كهربائية
صراع الملوك انتهى: كيفاش الصمت أطاح بالعروش؟
في عالم السيارات، كان سباق السرعة هو الحكاية الأكبر، حكاية بين Bugatti و Koenigsegg. وقت اللي كنت تتخيل أسرع كرهبة في العالم، كنت تسمع صوت محرك W16 يغّني ولا V8 يدوّي. أما هذا الكل تبدل في لحظة، خاطر البطل الجديد ما جا بحتى شي من هذا. دخل الساحة بهدوء، ومشى في طريقو بصمت، وغيّر قواعد اللعبة الكل.
رحلة إلى القمة: أرقام ما تتصدّقش
الـYangwang U9 Xtreme ما جاش يحكي برك. على مضمار ATP Papenburg في ألمانيا، عمل حاجة خلات العالم الكل ساكت. السائق الألماني Marc Basseng كان وراء المقود، ومعاه قوة ما تتصورش: 4 محركات كهربائية مع بعضهم، يعطيو قوة قريبة لـ3000 حصان! المحركات هذي تخدم بـtechnologie خاصة، وتلف حتى 30,000 “tour” في الدقيقة، وهو رقم قياسي عالمي في الصناعة.
الكرهبة هذي، اللي توزن حوالي 2480 kg، يعني ثقيلة شوية، لكنها فوتت الرقم القياسي القديم متاع الـBugatti Chiron Super Sport 300+ اللي عندو محرك 1600 حصان، وصنعت رقم جديد: 496.22 km/h. الكرهبة تخدم بمنصة 1200v اللي تخليها أقوى وأسرع ببرشة من أغلب الكراهب الكهربائية الأخرى. هذا الكل و عندها autonomie توصل لـ450 km في الشحنة الواحدة.
التكنولوجيا وراء السرعة الصامتة
السر موش في المحركات برك. الـYangwang U9 Xtreme فيها زادة نظام DiSus-X الذكي، وهو نظام فريد يخلي الكرهبة تطلع وتهبط عند كل عجلة وحدها. هذا يخليها ثابتة بشكل موش عادي في السرعات العالية جداً، ويخليها شادة في الكياس بشكل مثالي حتى في أصعب الظروف و تنجم توصل تمشي بثلاثة عجل كهو و تقعد المحافظة على توازنها
من "صنع في الصين" إلى قمة التكنولوجيا
لفترة طويلة، كان مصطلح “صنع في الصين” مرتبط في مخاخنا بالجودة العادية. أما اليوم الـYangwang U9 Xtreme بدلت الحكاية هاذي من أساسها. الكرهبة هاذي موش كان أسرع وحدة في العالم، أما هي زادة دليل قاطع اللي الصين ما عادش مجرد “مصنع” برك. توة ولات قوة كبيرة في الابتكار والتكنولوجيا، وتوري اللي المستقبل والسرعة نجمو يجيو من أي بلاصة في العالم.
الحكاية مازالت طويلة
نحبّو نرجعو للورقة متاع Koenigsegg Jesko اللي الكل يحكيو عليها. هي صحيح مازالت ما دخلتش في سباق رسمي، أما الخبراء يقولو إنها تنجم توصل لسرعة تفوت الـ500 km/h بفضل محركها V8 الجبار. أما الحقيقة، الـYangwang U9 Xtreme هي الوحيدة اللي حطت الرقم على الطاولة، وخليت بقية الكراهب الكل يتلفتو وراهم. توا، السباق الحقيقي مش باش يكون بين الـessence والـessence، أما باش يكون بين الـmoteur اللي يعطي الصوت و الـmoteur اللي يعطي الصمت.
: وختاماً
باش ما يفوتكم حتى شي، شاركونا ودعمونا في مواقع التواصل الاجتماعي. ابقاو معنا باش نصنعو أكبر Community في تونس!